由零開始學習股票－新手Q&A：藍籌股
文章難度：★☆☆☆☆ 好多時候新手想學股票，身邊人第一時間會話：「買藍籌股啦！實無死既！」就咁講低一句就走，大佬即係點呀😞（同埋藍籌股好明顯唔係實無死）所以小編綜合左幾個關於藍籌股常見既問題，幫大家做個解答。 Q：首先最簡單，咩係藍籌股？ A：藍籌股，即係指恒生指數成份股。恒指係香港股市表現既最主要指標，成份股包括金融業、公用事業、地產、科技及工業等代表企業。而成份股係指一些有份量、有實力的股票。個名由來係因為賭場入面，藍色的籌碼最值錢。要晉身成為指數成份股，條件當然要有份量、有實力，例如：市值大、買賣活躍(成交量大)、盈利往績好，以及係行業當中有代表性等。 Q：點解新手適合揀藍籌股而唔係其他？ A：港股總共有超過二千間公司，新手唔知點入手選股既時候，好容易揀錯股。從大藍籌股入手係其中一個簡單篩選優質公司作投資既方法。因為做得藍籌股既大部分都係發展相對成熟既公司，而且當中包括唔同種類既股票，例如高息股、高增長股等，適合唔同需要既投資者。 Q：買藍籌股入場費係咪好貴？ A：其實每隻藍籌股既入場費都唔同，有平有貴；以8月24號收市價為例：現時最低入場費既藍籌係萬洲國際(288)，未計算任何手續費買一手$3015；而最高入場費既藍籌係新鴻基地產(16)，未計算任何手續費買一手$58450。不過值得注意既係公司規模大小同股票入場費並無直接關係，詳細可以睇番〈股價愈高等於愈貴？〉http://bit.ly/marketcapprice Q：一日加入左做藍籌股，一世都會係藍籌股？ A：當然唔係！恒生指數公司每個季度都會做檢討，有可能會增加、剔除或調整佔比重。而係最新既季檢，成分股數目固定為50隻，但當中剔除左東亞銀行(23)同招商局港口(144)，以中國生物製藥(1177)及申洲國際(2313)取代。而大家耳熟能詳既國泰航空(293)、康師傅(322)、聯想(992)都曾經係藍籌股，但係因為各種原因(主要因為業績唔好、成交日漸疏落等)，最後被剔除出藍籌行列。 Q：我點知邊五十隻股票係藍籌股？ A：其實大部分財經網都有列齊晒恒指成份股表現，而最直接的就可以去恒生指數公司網站，睇下最Update既恒指成份股名單同資料，因為恒指成份股數目同比例每季都有機會作出調整。 Q：我本金唔多，但係可唔可以一次過買晒所有藍籌股？ A：可以！新手有呢個諗法好好，買晒所有藍籌股的確可以分散投資分散風險。而其中一個簡單直接可以買到全部藍籌股既方法，就係買恒生指數基金：盈富基金(2800)。不過值得留意既係，盈富基金會有些微跟蹤偏離度，唔能夠完全貼實恒指升跌幅，而2017年跟蹤偏離度為-0.1367%，所以升跌幅未必會完全跟足恒指。以8月24號收市價計算，盈富基金一手入場費$14200。